要保養一架車，包括車身、車廂同埋引擎，其實係一門專業技能。不正確嘅洗車，隨時損壞靚靚嘅車身，引擎積塵又容易老化，有可能影響性能，內籠洗唔淨更會影響駕駛者嘅健康！今期我地請到兩位由台灣引入究極美車工藝嘅專業汽車美容達人，同大家講下點樣先算係真・美車工藝！
記：Isaac R：戴惠豪 Rex G：何細昌 Gary
記：兩位好，想問下你地點解會做汽車美容服務呢？點解會轉型呢？
R：做左地產四年幾，經歷唔少，我曾經獲得「銷售界奧斯卡」DSA傑出銷售員大奬，又喺地產公司獲得金鷹殊榮，成績都算理想！地產行業日日都要面對唔少挑戰，養成我嘅冒險精神。早年澳門經濟起飛，發現唔少名車落地，但原來澳門欠缺專業嘅汽車美容公司滿足佢地嘅需要，令佢地嘅愛車冇正確嘅保養，因此令我萌生引入專業汽車美容嘅念頭。加上適逢近年地產業有萎縮跡象，而汽車保養都係必要消費，相對穩定嘅實業。於是，經過資料搜集之後，得悉台灣喺呢方面較先進，再喺機緣巧合之下搵到Coolcar呢個頂級品牌，成為加盟伙伴。
G：我同Rex係幼稚園同學，識左都有廿幾年，由細玩到大。我做左十年賭場，近年見到經濟下滑，遊客少左許多，意識到打工仔命運操縱喺老闆手上嘅無奈，一早已有創業念頭，阿Rex就搵我一齊合作。而我本身都係愛車之人，一直都對澳門嘅汽車美容服務唔多滿意，特別想將專業嘅美車工藝引入澳門。
記：可否分享一下籌備開店同加盟品牌嘅經過？
G：大約去年年中開始籌備，我地為此飛去台灣多次，先係了解品牌嘅情況，再同對方傾談加盟內容，喺過程當中，見識到人地先進嘅美車工藝技術同埋專業服務精神。呢個品牌嘅老闆好着重加盟伙伴嘅人品，唔係有錢就俾你加盟，佢要大家理念相近先會答應。而且佢要求加盟店嘅店主首先要接受技術培訓，所以我地都修讀過專業汽車知識課程同鍍膜工藝培訓，擁有技師專業證書。
R：我地係Coolcar第一間海外店，起初佢地都擔心監管嘅問題，因為佢地對加盟嘅要求好嚴格，更為我地專門建立一套海外店嘅加盟制度。總公司對加盟店嘅裝潢風格有規定，好似呢條「光隧道」，係我地公司嘅標誌。當總公司推出新產品，我地就要去台灣或日本培訓。每年所有加盟店都會聚首一堂舉行年會，每個加盟商都可以提出經營意見，意見獲接納後，全線嘅加盟店都會落實執行，好有團隊精神，發揮協同效應。
記：你地主要提供咩服務？洗車方式又有咩特色？
R：我地提供全面嘅汽車美容服務，包括高分子洗車、引擎清潔、汽車護膜同鍍膜，而汽車玻璃、燈罩同車軚，我地都有專門嘅清潔同保護物料。我地嘅美容用品全部係自家品牌，由日本嘅合作廠商生產，運用業界最新科技。我地着重細節，連清潔泡沫嘅配方都好講究，即使俾人用嚟沖涼都好安全，對客人同埋我地員工嘅健康都無害。而車廂內籠清潔，我地運用臭氧殺菌技術，配合新加坡品牌嘅純天然精油，呢隻精油係航空公司同五星級酒店都有用到嘅，呢種清潔方式係為左應對澳門嘅潮濕天氣，可以令車廂保持乾爽清新。我地每次都會為客人分析佢地架車嘅狀況，提供相應嘅護理方法，並指導正確嘅汽車護理意識俾客人。
G：以前啲人洗車，一桶水一塊布，其實愈洗愈傷車，造成車面上好多太陽紋，令架車漸漸暗淡無光，我地嘅洗車綿用完後會立即進行過濾沉澱，避免殘留砂石及污垢令其他車輛造成二次傷害。一般車行會用粗蠟修復花痕，其實粗蠟即係等於沙紙，只會磨薄車漆，美容變毀容！我地使用修復技術熔合車身花痕，做到真正嘅修補，係呢個行業嘅領先技術。
記：可否講解一下汽車鍍膜係咩嚟？
R：佢係一種類似軟性玻璃嘅物質，形成一層結晶覆蓋喺車身，將污染阻擋在外，防止紫外線同酸雨影響車漆，保護車身免於變黃或褪色，令到架車仲閃過新車。我地嘅品牌同日本嘅鍍膜研究所合作，生產專門用於車身嘅鍍膜物料，呢種物料，連私人飛機嘅機身上都會使用，已經可以話係屬於航太科技級別，耐用程度可見一斑。
記：店舖有無未來計劃？
R：目前先以穩定本舖為主，未來亦有擴充嘅意向，令客人更加就腳，方便佢地過嚟用我地嘅服務。
記：你地認為政府可以點幫助你地嘅行業？
G：澳門好難請到汽車美容技師，一來呢份係比較勞力嘅工作，二來需要專業技術，希望可以適當放寬人力資源。成日掘路都好有影響，特別係我地汽車美容嘅，一掘路就好難做生意，整完街頭又整街尾，有時喺正門口，令我地有一段時間都做唔到生意。
R：澳門因為汽車美容行業嘅人數唔多，欠缺一啲專為我地行業而設嘅保險類別。以台灣為例，有保險專門為汽車美容而設，架車喺洗車過程中如有損壞，保險會賠償；或者有啲車行會喺交車前為新車做鍍膜，將未套牌嘅車交由汽車美容業者處理，保險會保障呢一段處理過程。澳門嘅相關制度仍然落後，美容過程如有損壞只能自己處理，對行業長遠發展有阻礙。
記：最後，有無說話想同大家分享？
R： 創業會遇到好多困難，只要堅持落去，方法總比困難多。
G：「做到」同「做好」係兩回事，抱住堅定嘅決心，方能「做好」每件事情，令自己永遠企喺行業嘅頂端。
（訪後餘記：澳門好多行業嘅發展都較鄰近地區落後，有志之士想引入新模式改革行業，需要長遠嘅眼光同無比嘅勇氣，亦需要時間同耐性去灌輸新嘅消費意識俾大眾。澳門人多車更多，愈來愈多人對汽車美容服務有要求，相信Coolcar嘅營運模式會為行業帶來一股新風氣。）
Coolcar車酷頂級美車工藝
電話：28922281
營業時間：10:00 – 19:00
facebook：https://www.facebook.com/coolcarmacao/
Website：https://coolcar.com.tw/
記者／Isaac
黃黑配色的店面，加上明亮的「光隧道」，甚具型格
戴惠豪 Rex
何細昌 Gary
每個工序都有專用的海棉，分工仔細
Coolcar自家品牌汽車美容用品，自主研發，獨家配方
「做到」同「做好」係兩回事，抱住堅定嘅決心，方能「做好」每件事情，令自己永遠企喺行業嘅頂端。